HUGOT nga naniid ang Police Regional Office (PRO) 7 bahin sa gikatahong tinguha sa 'mga nagkahiusang kritiko' ni Presidente Rodrigo Duterte, lakip na ang naa sa oposisyon, sa pagpalagput niini sa katungdanan sa sunod buwan.

Unang giangkon sa AFP Chief of Staff General Carlito Galvez ug sa Deputy Chief of Operation Brig. General Antonio Parlade nga tinuod ang hugonhugon nga adunay grupo nga palagputon sa katungdanan si Presidente Duterte niadtong Septiyembre 21.

Apan napakyas kini human wala makakuhag daghang suporta gikan sa nagkadaiyang grupo ug giingong subli nila kining buhaton sa sunod buwan nga gitawag nga red october tungod sa pagsaulog sa mga walhong grupo sa international communism.

Gidasonan usab kini sa Police Regional Office 7 sanglit milutaw usab kini sa intelligence monitoring sa kapulisan diin nanguna sa maong plano ang founder sa CPP-NPA-NDF nga si Jose Maria Sison apan wala kini pasagdi sa mga tinugyanan sa balaod.

Gipasalig ni Supt. Reyman Tolentin nga sa habig sa Philippine National Police walay mi suporta sa maong plano ilabi na sa mga batan-ong police official nga init pa ang dugo.

Dugang ni Tolentin nga taas ang morale sa tanang pulisa tungod sa gihatag nga suporta sa Duterte administration kanila ug karon lang sila naka sinati niini itandi sa ubang administrasyon.

“Sa PNP ang junior officers wala man mi na monitor ana nga mo participate to oust the president in fact the PNP junior officers are satisfied ang very happy with the leadership of our president,” matod ni Supt. Reyman Tolentin.

Sa gitug-an sa AFP giingong nagtinguha ang mga walhong grupo nga gisuportahan nilang Senador Antonio Trillanes ug ka partido niini nga ipasira ang manufacturing industries pinaagi sa ubang labor groups.

Nagsabotahi matod pa karon ang mga union sa nagkadaiyang kompanya nga molusad og lihok protesta sama sa nahitabo sa Nutri-Asia sa Marilao Bulacan.

Ang AFP nakakuhag dokumento gikan sa Tindig Pilipinas nga nakig-alayon kini sa Movement Against Tyranny aron palagputon sa pwesto ang pangulo sa buwan sa Oktubre.

Bisan pa niini ,magpadayon ang suporta sa kapulisan sa ilang commander-in-chief, matod ni Tolentin ngadto sa media kagahapon. AYB