SUGOD sa Oktubre 29, 2021, dili na kinahanglan pa ang pagpakita sa reverse transcription polymerase chain reaction (RT-PCR) test o antigen test o ang pagpresentar og medical certificate alang sa mga pasahero nga fully vaccinated batok sa Covid-19 sa gustong mobiyahe paingon sa Probinsya sa Sugbo gikan sa laing lalawigan.

Kini tungod kay gitugotan na ni Cebu Gov. Gwendolyn Garcia ang pagbiyahe ilabi na sa mga Sugboanon paingon sa Probinsya basta kompleto nang nabakunahan.

Usa kini ka paagi sa kagamhanan paghatag og insentibo ug pag-awhag usab sa mga pasahero sa pagpabakuna aron malikay sa hulga sa naasoy nga sakit.

Base sa memorandum ni Garcia nga gipetsahan og Oktubre 29, 2021, iyang gimandoan ang tanan nga local chief executives, kapulisan, Philippine Coast Guard, mga opisyal sa airport ug ship operators sa pagpatuman niini “effective immediately.”

Aron makabiyahe, kinahanglan lang dad-on o ipakita ang vaccination card o vaccination certificate sa pagpamatuod nga nabakunahan na.

Kadtong wa pa mabakunahi o wa pa makakompleto sa ilang bakuna, kinahanglang mopresentar og medical certificate.

Sa Oktubre 1, unang miluwat og kamandoan si Garcia sa pagpangayo lang og medical certificate inay RT-PCR o antigen test sa tanan nga mga pasahero nga mopauli, nabakunahan man o wala. (ANV)