GISUSI sa mga sakop sa Provincial Veterinary Office (PVO) ang mga lungsod nga may mga poultry farm ingon man ang mga lugar nga may daghan nga migratory birds lukop lalawigan sa Sugbo.

Kini human nakatala na og kaso sa bird flu ang lungsod sa Jaen, Nueva Ecija human namatay ang 1,500 ka mga buntog nga positibo sa maong sakit.

Matod ni Dr. Mary Rose Vincoy, pangu sa PVO, nga ang strain sa H5n6 highly pathogenic.

Buot pasabot nga taas ang posibilidad nga motakboy ang sakit ngadto sa tawo.

“This strain is highly pathogenic which is zoonotic, meaning it has a potential to transfer to humans. Since 2014, and during the outbreak in 2017, wa man naapektohan nga mga Filipinos at that time, especially farmers”,matod ni Vincoy sa mga tigbalita sa Marso 16, 2020.

Sugod Enero 2020 mipahigayon na ang PVO og monitoring.

Lakip sa gi-monitor karon sa PVO mao ang Bantayan Island isip egg basket sa Sugbo ug laing lugar sa lalawigan.

Kini sanglit ang kagaw motapot usab di lang sa manok, lakip sa mga itlog. (ANV)