TACLOBAN City - Patay ang usa ka pulis kahuman gipusil sa wa mailhing mamumuno samtang sakay sa usa ka sports utility vehicle (SUV) ning dakbayan, pasado alas 11 sa buntag kagahapon, Enero 24, 2020.

Giila sa kapulisan ang biktima nga si Police Chief Master Sergeant Renato Singkol kinsa nadestino sa Basey, Samar, taga Camella LA Pradera Subdivision, Ormoc City.

Base sa report sa Police Regional Office (PRO) 8, si Singkol padung na unta mosakay sa iyang pick-up nga Mitsubishi Strada gikan sa Philippine Statistics Authority (PSA).

Pagdayong sakay ni Singkol, niabot ang usa ka itom nga SUV nga giingong Ford Everest diin ang sakay niini namusil kang Singkol.

Patay si Singkol samtang dali nga nisibat sa wa mahibaw-i nga direksyon ang mga responsable.

Si Singkol nadestino kaniadto sa Ormoc City ug nagsilbi nga imbestigador.

Padayon pa ang imbestigasyon sa kapulisan sa maong insidente. (JKDP)