TACLOBAN -- Patay ang usa ka pulis human gipusil sa wa mailhing responsable sakay sa usa ka sport utility vehicle (SUV) sa Tacloban City, pasado alas 11 sa buntag, Biyernes, Enero 24, 2020.

Giila sa kapulisan ang biktima nga si Police Chief Master Sergeant Renato Singkol kinsa nadestino sa Basey, Samar, taga Camella LA Pradera Subdivision, Ormoc City.

Base sa report sa Police Regional Office Eastern Visayas, si Singkol padung na unta mosakay sa iyang pick-up nga Mitsubishi Strada gikan sa Philippine Statistics Authority.

Pagdayong sakay ni Singkol, niabot ang usa ka itom nga SUV nga giingong Ford Everest diin ang sakay niini ang namusil kang Singkol.

Patay si Singkol samtang dali nga misibat sa wa mahibaw-i nga direksyon ang mga responsible.

Si Singkol nadestino kaniadto sa Ormoc City ug nagsilbi nga imbestigador.

Padayon pa ang imbestigasyon sa kapulisan sa maong insidente. (JKDP)