IMBESTIGAHON sa Cebu Police Provincial Office (CPPO) nga duha ka mga pulis ang nanigbakay ug nakaeskapo sa ronda sa Provincial Intelligence Unit (PIU) sa bukirang dapit sa lungsod sa Liloan sa Sabado, Nobiyembre 21, 2020.

Ila usab nga susihon ang impormasyon nga ang duha ka mga pulis nagpasiugda.

Nakadawat og impormasyon ang kapulisan sa probinsya labot sa tigbakay sa Purok Caimeto, Barangay Lataban, bukirang dapit sa lungsod sa Liloan.

Dali nga gisusi sa mga personnel sa PIU, apan sa ilang pag-abot, nialibwag sa pagpanagan ang mga sugarol nga nakakita, ang uban kanila nangahulog pa sa pangpang.

Onse ka mga tawo nga nagtigbakay nangadakpan sa mga sakop ni Police Lieutenant Colonel Randy Korret mga alas 2:45 Sabado sa hapon, Nobiyembre 21, 2020.

Ang nasikop giila nga silang Kurt Russel Gemina, Anthony Laygan, Alvin Noval, Kevin Tagalog, Allan Noval, Jonas Tanjay, Rogelio Bohol, Jomar Pitogo, Mario Dayday, El Nino Pando ug Welfredo Maglasang.

Giingong nakaeskapo ang duha ka mga pulis nga nailhan na nila ni Korret.

Kasong kriminal ug administratiba ang ipasakang kaso batok sa duha ka mga pulis.

Dugang ni Korret nga ilang gitinguha nga mataktak sa serbisyo ang duha ka personnel nga kabahin sa internal cleansing ni PNP Chief Police General Debold Sinas.

“Ginagawa namin ang trabaho sa internal cleansing. Yun man yung program ni Chief PNP na palakasin ang internal disciplinary machinery. Dapat kasi, tigilan na nila ang kalokohan. Di ba magtrabaho na lang tayo sa tamang trabaho kasi malaki na ang sahod eh,” matod ni Korret.

Gipugngan sa Superbalita Cebu ang mga ngan sa duha ka mga pulis samtang wa pay kasong napasaka.