NASIKOP ang usa ka pulis sa usa buy-bust operation nga gipahigayon sa mga sakop sa Pardo Police Station pasado alas 6 ganinang hapon, Hunyo 7, sa Caimito Street, Barangay Basak-Pardo, ning siyudad sa Sugbo.

Ang nasikop giila nga si Police Corporal Rogelio R. Atillo, nga sakop sa Drug Enforcement Unit sa Labangon Police Station 10.

Nakuha kaniya ang usa ka paketeng shabu lakip na ang iyang service firearm nga Glock 17 ug P27,000 nga mark money sa buy-bust operation.

Kasamtangan nga gitanggong karon sa selda sa Cebu City Police Office (CCPO) ang drug pusher nga pulis.

Atol sa interview sa dinakpan sa mga sakop sa Pardo Police Station, siya miangkon nga niadtong miaging semana naka baligya siyag 15 gramos sa gituohang shabu.

Ganinang hapon nakuhaan na usab siyag 15 gramos nga gituohang shabu sa iyang posisyon.