Pulis nga kuyog sa usa ka babaye samtang nag-angkasay sa motorsiklo patay human pusila sa wa mailhing gunman mga alas 9 sa buntag sa Sabado, Mayo 29, 2021 sa national highway sa Barangay Dakit, lungsod sa Barili, Sugbo.

Ang namatay diha-diha giila ni Police Major Romeo Caacoy Jr. nga si Police Master Sergeant Raymund Zozobrado, 40, nadestino sa Guihulngan, Negros Oriental, taga Mambaling, Dakbayan sa Sugbo.

Si Caacoy niingon nga nagsakay sa iyang Nmax nga motorsiklo si Zozobrado, angkas niya si Vanessa Go Tura, 30, taga Mohon, Talisay.

Matod ni Caacoy nga samtang nagsubay sa karsada sila si Zozobrado, ang gunman nagsunod kanila nagsakay sa usa ka Toyota Innova (plate no. 8735) dihang gipusil si Zozobrado.

Ang duha ka mga sakyanan pulos padung sa Dakbayan sa Carcar.

Human matumba ang motorsiklo, nisirit pagdagan ang Innova padung sa Dakbayan sa Carcar.

Nanawag dayon sa ubang mga police station sila si Caacoy alang sa blocking force, apan sa pagsuwat ning taho, wa pay kalamboan.

Niadtong Abril 29, 2018, si Zozobrado ni-survive sa usa ka ambush sa Barangay Mambaling, Dakbayan sa Sugbo.

Niadtong higayuna, gikan siya sa bilar sa laing pulis nga gipatay usab.

Si Zozobrado nadestino kaniadto sa City Intelligence Branch sa Cebu City Police Office. (GPL)