PULIS nga giingong kanhi body guard ni Police Lieutenant General Marcelo Garbo gipusil sa armadong mga tawo nga sakay og utility vehicle samtang siya naglingkod gawas sa ilang balay sa dalan Cabreros, Barangay Basak San Nicolas, Dakbayan sa Sugbo niadtong Huwebes sa gabii.

Iyang batang pag-umangkon nga babaye, 9, nga diha sa gawas sa balay, napagan.

Ang pulis giila nga si Patrolman Percival Eborlas, 47, nadestino na Bayawan, Negros Oriental. Balay ni Eborlas duol ra sa barangay hall.

Matod ni Police Master Sergeant Nicolo Gonzales, imbestigador sa Mambaling Police Station, mga pasado alas 9 sa gabii human sa pagpanihapon, si Eborlas nigawas sa ilang balay aron manigarilyo uban sa mga silingan.

Pipila ka gutlo ang milabay, nakabantay siya nga dunay Mitsubishi Adventure nga kanunay magbalikbalik og agi sa ilang tugkaran.

Wa manumbaling si Eborlas tungod kay daghan usab mga sakyanan nga nangagi.

Sa dihang nanguli na ang mga silingan nga iyang kadungan sa pagpanigarilyo, nanganaog ang mga sakay sa Adventure ug dayong pusil kaniya.

Wa matino sa mga pulis kon pila ka mga tawo ang sakay.

Naigo si Eborlas sa iyang tiil hinungdan nga midagan siya pasulod sa ilang balay uban sa 9 anyos nga pag-umangkon, apan ang mga armadong lalake nisuway pa og sulod aron usban siyag pusil.

Human makita sa mga gunman nga adunay dala nga bata si Eborlas, dali kini nga namiya sa dapit samtang ang pulis nga samdan ug ang iyang pag umangkon gidala sa usa ka pribadong tambalanan sa Dakbayan sa Sugbo.

Dugang ni Gonzales nga naglisud sila karon sa imbestigasyon tungod kay nagdumili ang pamilya sa pagkooperar.

“Ang mismo nga mga pamilya hesitant kaayo moestorya kon asa nga hospital gidala ug unsay status sa biktima. Ang ilang giingon okay na daw, naay samad sa paa pero wala sila nag disclose kon asa dapit nga paa,” matod ni Gonzales.

Dunay daghang nakasaksi sa hitabo, apan ang dakong problema sa Mambaling Police Station nag dumili kini sa pagluwat og pamahayag tungod sa kahadlok.

Ipasubay nila karon ang mga CCTV camera sa dapit kon aduna bay nakakuha niini.

Personal nga atraso ang usa sa mga gitan-aw nga motibo sa suway nga pagpatay kang Eborlas, matod ni Gonzales.

Ilang ipasusi unsa ang mga kaso nga gihuptan niini sa dihang nadestino pa kini sa Cebu City Police Office ug kapulisan sa probinsya sa Sugbo.

Si Eborlas nadestino kaniadto sa City Intelligence Branch sa CCPO, apan niadtong Oktobre 2019, gibalhin siya sa Negros Oriental.