Usa ka pulis ang nagpositibo sa illegal drugs tali sa kapin 500 ka mga pulis sa Cebu City Police Office (CCPO) nga gipaubos sa kinalit nga drug test.

Ang maong pulis nadestino sa Sawang Police Station 6 ug gipaubos na sa imbestigasyon sa CPPO samtang nagpaabot sa confirmatory test gikan sa Camp Crame.

Ang CCPO nipatuman sa kamandoan sa bag-ong milingkod nga hepe sa kapulisan lukop nasud nga si Police General Debold Sinas, kinsa kanhi direktor sa Police Regional Office (PRO) 7, bahin sa drug testing.

Matod ni Police Colonel Josefino Ligan, hepe sa Cebu City Police Office (CCPO), nga gipaabot nalang ang resulta sa gihimong confirmatory test sa Camp Crame.

“Overall we have 570 Cebu City Police Office personnel who underwent drug testing. Out of that, one na nag-positive and he is contesting that result nagpa confirmatory pa ta,” matod ni Ligan.

Giparelibohan sa katungdanan ang maong pulis gikan sa Sawang ug giimbargohan na usab kini sa iyang service firearms ug gidestino sa CCPO headquarters.

Matod ni Ligan nga kung mamatud-an sa confirmatory test nga tiggamitan sa illegal nga drugas ang maong pulis ipaubos dayon kini sa dismissal proceedings.

Ang kampanya nga gipatutukan karon ni Sinas mao ang pagpuhag sa illegal drugs ug ang paglimpyo sa hut-ong sa kapulisan sa nasod.

“Sa atong mga kapulisan labi na karon nga bag-o na ang atung PNP chief nga gikan diri sa PRO-7 nga hugot ang kampanya sa ilegal nga drugas sa iyang pamunoan, palihug ayaw involve aning aktibidad sa ilegal nga druga either sa paggamit or pagpayuhot,” pasidaan ni Ligan.

Magpadayon pa ang drug testing hangtod mahurot ang 1,200 ka police personnel sa CCPO sa dili pa matapos ang tuig 2020

Gipang-monitor karon ni Ligan ang iyang mga tawonga nagpadayon sa illegal drugs aron limpyohan niya ang ilang han-ay ug mas masaligan sa pagpatuman sa balaud batok sa gidiling druga. / AYB