SAN Francisco, Southern Leyte - Usa ka pumpboat ang nalunod sa kadagatan ning lungsod alas 4 sa kaadlawon, Miyerkules, Hulyo 17.

Sakay sa pumpboat ang pito ka mga mananagat nga pulos mga taga Surigao.

Luwas na hinuon kini nga nadala sa San Francisco Police Station. Ang pito mao sila si Roy Contreras, operator; Albert Saluta; Joseph Mapalo; Ronnie Ababon; Nestor Porarel; Roy Ancagan ug Noel Angub.

Matod ni Contreras ninggikan sila sa Surigao alas 4 sa hapon, Martes, Hulyo 16.

Nahitabo ang pagkalunod alas 4 sa kadlawon sa misunod nga adlaw tungod sa dagko nga bawod. Dugang ni Contreras nga wa sila mahibawo nga dagko diay kaayo ang bawod sa ilang paingnan.

Si Police Captain Eufracio Javines nakadawat sa impormasyon alas 3 na sa hapon, Miyerkules, Hulyo 17.

Matod ni Javines, nakita-an sa mga tawo ang mga mananagat nga nagkaway kaway hinungdan nga dali nga girespondehan sa kapulisan, Coast Guard ug Municipal Disaster Risk Reduction Management Office (MDRRMO).

Gidala sila sa estasyon sa kapulisan ug gipaubos sa medical examination ug gipamalitan og sinina sa Department of Social Welfare and Development (DSWD).