Usa ka milyon ka pesos ang balor sa gidiling drugas nga nasakmit gikan sa usa ka 38 anyos nga lalaki atol sa ronda nga gihimo sa Naga City Police Station sa Sityo V. Rama, Barangay Langtad, dakbayan sa Naga, pasado alas 2:00 sa hapon sa Miyerkules, Enero 25, 2023.

Nangulo sa operasyon mao si Police Lieutenant Colonel Junnel Cadlawon, hepe sa Naga City PNP, uban ang iyang mga sakop nga miresulta sa pagkasikop sa usa ka Egmidio Gadoy Delima, alyas Joros, taga Barangay Guadalupe, Dakbayan sa Sugbo.

Atol sa buy-bust, nasakmitan si Delima og shabu nga nitimbang og 150 gramos nga mobalor og P1 million base sa standard drug price (SDP).

Nadakpan si Delima tungod sa unang nasikop nga suspek sa pagpayuhot og drugas nga nibutyag sa iyang tinubdan.

Kalapasan sa Republic Act 9165 o Comprehensive Dangerous Drug Act of 2002 ang atubangon nga kaso sa dinakpan.