WALA nay pagpangubkob nga mahitabo sa tibuok lalawigan sa Sugbo sugod Lunes, Hulyo 1, human gisuspenso ni Gobernador Gwendolyn Garcia ang proseso sa tanang mga aplikasyon sa sand and gravel (SAG) permits samtang i-review.

Ang suspensyon alang sa mga aktibidad sa pagpangubkob kansang mga permit giisyu sa kagamhanan sa lalawigan sa Sugbo.

Si Garcia sa iyang pag-asumir sa katungdanan isip gobernador sa lalawigan niadtong Hunyo 30, 2019, niluwat og upat ka memorandum circulars ug executive order nga may kamandoan sa tulo ka mga buhatan sa Kapitolyo ug sa contractor sa katukoran sa 20 ka andana nga Provincial Resource Center.

Tabang

Sa iyang unang adlaw sa trabaho sa iyang pagbalik sa Kapitolyo human sa unom ka tuig, siya nakigpulong sa mga empleyado human sa flag raising ceremony niadtong Lunes sa buntag, Hulyo 1.

Iyang giagni ang mga kawani nga motrabaho ug namahayag nga nanginahanglan siya sa tabang ni Bise Gobernador Hilario Davide III, mga miyembro sa Provincial Board, department heads ug mga empleyado.

“Let us join hands to work for our beloved Cebuanos because it is the only way we can truly achieve progress and development for this beloved province,” pamulong ni Garcia.

Human sa pulong sa mga kawani, mi-courtesy call si Bise Gobernador Hilario Davide III ug mga miyembro sa Provincial Board kang Garcia.

Kini naglakip nila ni Bokal Thadeo Jovito Ouano, Glenn Anthony Soco, Kerrie Shimura, Yolanda Daan, Christopher Baricuatro ug Red Duterte.

Gisuspenso

Sa iyang Memorandum Circular No. 4-2019, siya nimando sa dinalian nga suspensyon sa tanang mga sand and gravel (SAG) permits nga giisyu sa kagamhanan sa lalawigan sa Sugbo pending sa iyang pag-review.

“To put a stop to the unabated illegal quarrying activities in the Province of Cebu and to prevent the further degradation of the environment which causes calamities that result to massive destruction of properties and loss of human lives, and in view of my administration’s decision to review all sand and gravel permits...” tipik sa maong kamandoan.

Gitigom

Sa unang mga oras, gitigom ni Garcia ang mga department head ug mga opisyal sa lainlaing mga ahensiya sa gobiyerno sa social hall sa Kapitolyo ug gipamati ang tagsatagsa ka mga programa ug proyekto nga gipangbuhat niini.

Sa tigom, si Rodel Bontuyan, officer-in-charge sa Provincial Environment and Natural Resources Office (Penro) niingon nga 68 ka SAG permits, 15 ka quarry permits, 29 ka special permits, 15 ka accreditations ug uban pa ang naisyu sa ilang buhatan.

Ang gobernador nagpatabang sa Cebu Provincial Police Office ug Armed Forces of the Philippines sa paggukod niadtong mga nagbuhat og illegal quarry operations sa lalawigan.

Sigon ni Police Colonel Roderick Mariano, provincial director sa CPPO, nga tahasan niya ang chiefs of police sa kalungsuran ug mga siyudad sa pagpahigayon og operasyon batok illegal quarry ubos sa ilang hurisdiksyon.

Gipahunong

Ang ikatulong memorandum ni Garcia nagmando usab sa dinalian nga suspensyon sa tanang trabaho kabahin sa mga proyekto nga gipahigayon sa Provincial Engineer’s Office ingon man paghatag og notisya sa hingtungdang mga kontraktor sa suspensyon.

Iyang gipasumitir si Provincial Engineer Hector Jamora og detalyado nga report sa mga programa ug proyekto sa buhatan niini apil na ang mga proyekto nga nahuman na, nagpadayon ug ipatuman pa, sud sa 48 ka oras gikan sa pagdawat sa iyang memorandum.

Ang laing memorandum sa gobernador nagmando kang Jone Siegfred Sepe, pangu sa Provincial General Services Office, sa pag-recall dayon sa tanang mga sakyanan ug ekipo nga gipanag-iya sa lalawigan nga kasamtangan naka-assign pinaagi sa memorandum receipt sa mga local government unit ug lainlaing mga buhatan.

Gipaimbentaryo

Iya usab gipasumitir og inventory report si Sepe sa dili pa ang Hulyo 5 nga magpakita kon unsa kini nga mga sakyanan ug ekipo ug asa kini nahimutang sa kasamtangan.

Apil niini ang bag-ong mga bus nga may nakasuwat “Kalamboan sa Matag Sugbuanon”, mga ambulansya, police cars, computer, cellphones, culverts ug ubang movable nga mga butang.

Sa iyang labing unang executive order nga pinetsahan og Hunyo 30 apan gipagawas niadtong Lunes, Hulyo 1, gimandoan ni Garcia ang WT Construction, Inc. ug si bisan kinsa sa dinalian nga paghunong ug permanente nga dili na ipadayon ang tanang mga aktibidad kalabot sa konstruksyon sa P1.3 bilyones nga edipisyo.

Ang gobernador niinspeksyon sa dapit diin pabarugon ang edipisyo sa karaan nga Bureau of Agriculture Extension (Baex) building, sud sa compound sa Kapitolyo.

Iyang nakita nga lawom na ang nakawot sa contractor, apan way mga trabahante ang nagtrabaho ug wa usay opisyal ang niatubang niya.

Iyang gipangutana ang mga miyembro sa iyang transition team kon pila ang kinahanglanon nga kantidad aron matabunan og yuta ang lugar.