Ang Iglesia ni Cristo (INC), nga naila sa ilang bloc voting, nipadayag og suporta sa pipila ka mga kandidato sa Sugbo karong umaabot Mayo 9, 2022 nga eleksiyon.

Ang tandem nila ni Cebu City Mayor Michael Rama ug Konsehal Raymond Alvin Garcia nakadawat og suporta sa INC alang sa ilang tinguha pagka mayor ug bise mayor sa umaabot nga piniliay. Sa press conference sa Biyernes, Mayo 6, si Rama nipahibawo nga pormal na nga giendurso sa relihiyusong grupo ang ilang kandidatura alang sa top two spots sa Cebu City Government.

Si Rama nipadayag sa iyang pasalamat sa relihiyusong grupo nga naila sa bloc voting sa mga sakop niini. “I have been connected with a member of Iglesia Ni Cristo and it is already on their ballot and I do not want to be showing the ballot because it might also promote others but I am officially been endorsed by Iglesia,” matod ni Rama.

Sa iyang Facebook page, gipahibawo ni Garcia ang iyang pagpasalamat sa INC sa pagpaluyo sa iyang kandidatura.

Si Garcia nitug-an sa SunStar Cebu nga ang INC nisuporta kaniya sukad pa sa iyang pagdagan pagka konsehal niadtong 2016 election.

“That is a very welcomed development and I am very happy, honored, and privileged nga ako gyud gipili pagka kandidato pagka vice-mayor diri sa atong siyudad sa Sugbo,” matod ni Garcia.

Sa pipila ka mga post sa social media, ang INC gikataho usab nga nihatag sa ilang endorsement sa reelection bids nila ni Cebu Gov. Gwendolyn Garcia, Talisay City Mayor Gerald Anthony “Samsam” Gullas Jr., Lapu-Lapu City Mayor Junard “Ahong” Chan, Lapu-Lapu City Vice Mayor Celedonio “Celsi” Sitoy ug Cebu City Councilors Jerry Guardo ug Joel Garganera.

MAGTIAYONG FRASCO

Ang INC niendurso usab sa reelection bid nila ni Cebu Fifth District Rep. Vincent Franco “Duke” Frasco, ug iyang asawa, Liloan Mayor Christina Frasco ug mga sakop sa iyang slate.

Matud pa ni Frasco nga kini ang ikaunom nga eleksiyon nga giendorso siya sa INC. Una siyang naendurso sa relihiyosong grupo niadto pang 2007 dihang una siyang nidagan pagka mayor sa Liloan, amihanang Sugbo.

Gawas kang Frasco, ang iyang asawa, si Christina, ug ang iyang running mate, kandidato pagka-bise mayor ug incumbent nga konsehal sa lungsod nga si Aljew Frasco; ug ang mga kandidato sa pagka konsehal ubos sa ilang slate, nakakuha usab og mga endorsement sa INC.

Gipasalamatan ni Frasco ang INC ubos sa pagpangulo ni Ka Eduardo Manalo sa makanunayon nga suporta. “I am deeply grateful to the leadership and members of Iglesia ni Cristo for their consistent endorsement and support since I first ran for mayor in 2016,” matod sa mayor sa Liloan.

Giendurso usab sa INC ang kandidatura ni Cebu City South District congressional candidate BG Rodrigo Abellanosa.

Sa iyang Facebook page, si Abellanosa, anak ni incumbent Cebu City Rep. Rodrigo Abellanosa, nagpasalamat sa INC, partikular sa executive minister niini nga si Manalo, sa pag-endorso kaniya. (JKV, IRT, ANV, MKG, PR)