Suspetsadong rapist wa makaeskapo sa kapulisan kay iyang nasul-ob ang short pants sa usa ka inahan nga giiingong iyang gi-rape.

Nakaeskapo makadiyot si Roldan Luchavez, 46, human niya giingong gi-rape ang 49-anyos nga si Nena (di tinuod nga ngan), iyang silingan, niadtong Miyerkules sa gabii, Nobiyembre 25, 2020 sa sityo Matab-ang, Barangay Sunog, lungsod sa San Francisco, mga isla sa Camotes.

Apan matod ni Police Major Alfredo Kuhay Jr., hepe sa San Francisco Police Station, wa na makapanghimakak si Luchavez dihang positibo siyang gitudlo sa ginang ug giila ang short pants nga gisul-ob ni Luchavez nga iyaha.

Si Kuhay nga nahinabi sa Superbalita Cebu nagkanayon nga si Nena nitug-an nga siya lang ang nahabilin sa ilang balay niadtong higayuna.

Nag-inusara siya sa panihapon dihang si Luchavez nga hubog kalit nga niabot, nidiretso sa paghamag kaniya ug gilamba siya sa ilang sala.

Wa na siyay nahimo, nalupig siya sa kusog ni Luchavez, gihuboan sa iyang sapot ug short pants.

Human sa paglugos, dali nga nisibat si Luchavez ngadto sa balay sa iyang paryente, apan iyang nasul-ob ang short pants ni Nena.

“Nanghimak siya, Sir, nga wala mohimo sa krimen, nahubog daw siya. Mao na nasulod didto sa balay. Unya gipangutana sa akong sakop nganong ang shorts sa biktima imo man nang gi-sul-ob, didto gipusasan,” dugang ni Kuhay.

Si Luchavez naa nagtingkagol sa bilanggoan alang sa kasong rape nga ipasaka batok kaniya. / GPL