NASIKOP sa hiniusang pwersa sa kasundalohan ug kapulisan ang usa ka dakong miyembro sa Communist Party of the Philippines - New Peoples Army (CPP-NPA) Southern Leyte Front.

Giila ang nasikop nga si Felomino Salazar ug naila sa mga alyas nga Jun Salazar, Lino Salazar ug Celso. Si Salazar nasikop sa mga awtoridad sa Barangay Tinago, Inopacan Leyte, Martes, Hulyo 14, 2020.

Dala sa Joint Task Force Tandaya ang warrant of arrest nga giisyu sa National Capital Region, Regional Trial Court, Branch 32 sa 15 counts nga murder batok kang Salazar.

Matod sa kasundalohan, gipasaka ang mga kasong 15 counts of murder batok kang Salazar gumikan sa pagpatay niini sa mga giilang kaalyado sa gobyerno niadtong 1980s nga gitawag og “Operation Anti-Veneral Disease.”

Si Salazar lakip sa mga sakop sa CPP-NPA intelligence group nga ang trabaho mao ang pag ila ug pagpatay sa mga gisuspetsahan nga impormante sa gobiyerno. Ang mga kauban ni Salazar nga nibalik na sa gobyerno ang nitug-an nga si Salazar naila nga “Taga-ihaw” sa mga gisuspetsahan nga impormante sa gobyerno. (JKDP)