GIAWHAG sa Commission on Elections (Comelec) ang mga Sugboanon nga pahimuslan ang higayon nga gilugwayan na ang adlaw sa pagparehistro ngadto sa Oktubre 31 gikan sa tagal nga Septiyembre 30 alang sa piniliay sa 2022.

Mao kini ang gibutyag ni Atty. Lionel Castillano, election officer sa Comelec sa lalawigan sa Sugbo kagahapon, Septiyembre 29.

“Hopefully they will take advantage of the extended days of registration and should not wait for the last day,” matod ni Castillano.

Naobserbahan sa Comelec ang pagsaka sa mga nakaparehistro base sa Septiyembre 28, 2021 nga datus.

Subay sa listahan niini, moabot sa 3.2 milyunes na ang nakaparehistro sa tibuok probinsya, lakip na niini ang independent cities sa Sugbo, Mandaue ug Lapu-Lapu.

Matod ni Castillano, gawas sa Comelec offices, magpadayon usab sa pagbukas ang satellite voters registration ilabi na sa malls gikan sa alas 8:00 sa buntag hangtod alas 5:00 sa hapon.

“The field employees would always follow the en banc decision. We also acknowledge the influx of applicants and their desire to be registered,” dason niya.

Ang voters registration gikatakda nga motapos karon, Septiyembre 30, apan giaprubahan ang extension mahimo sa pagparehistro sugod sa Oktubre 11 ngadto sa 30. (ANV)