MAGPAPATIGAYON sa kontrobersiyal nga international port sa lungsod sa San Fernando gusto nga moatubang usab sa mga sakop sa Provincial Board aron madungog ang iyang habig batok ni Mayor Neneth Reluya.

Si Ruben Feliciano, tag-iya sa First Sangat SF International Port Corp. (FSSFIPC), nisaad nga ibutyag ang giingong tanang hugaw batok ni Reluya sa higayon nga mahatagan siya og higayon nga makasulti sa PB.

“She received a huge cash advance. I know she received it, I was there. Mao nang mura na siyag bibingka run,” butyag ni Feliciano dihang nahinabi sa mga tigbalita kagahapon.

Siya nihimo sa reaksyon human si Reluya namulong atubangan sa mga provincial board member kagahapon bahin sa pagdumili ni Feliciano nga motuman sa iyang giluwatan nga cease and desist order (CDO) nga nagpahunong sa pagtukod sa international port sa Barangay Sangat.

Atol sa ilang regular session, ang mga bokal nagkasabot nga patambungon sila si Reluya, Feliciano ug mga representante sa hingtungdang mga ahensiya sa gobiyerno sa committee hearing aron mohatag og katin-awan sa proyekto.

Sa iyang pagpamulong atubangan sa mga bokal, si Reluya nisaysay kon giunsa ni Feliciano ug sa kompaniya niini paghimo sa proyekto sa Barangay Sangat bisan sa kakuwang sa gikinahanglan nga mga dokumento.

Ang mayor nibutyag nga nagsugod na og tambak og yuta sa dapit bisan kon giingong wala pa kini makakuha og permit gikan sa Philippine Reclamation Authority (PRA).

Matod ni Reluya, ang pagtrabaho ni Feliciano sa lugar giingong nakadaot sa pipila ka mga bakhaw sa dapit.

Ang mayor nidugang nga niisyu siya sa executive order batok ni Feliciano human mahibaw-i nga ang kompaniya niini dili na ang samang kompaniya nga ni-apply og clearance sa municipyo pipila ka tuig na ang nakalabay.

Ang kasamtangan nga pangan sa kompaniya ni Feliciano kay First Sangat, nga orihinal nga nakapangan og Sangat Bay Development Corp., apan giusab tungod sa internal nga bangi sa kanhi partner niini, ang Melekon Contractors Inc. (SCG)