HATAGAN sa Dakbayan sa Talisay og P20 mil nga cash ang triathlete nga Talisaynon nga nakalabni og silver medal sa nagpadayon nga 30th Southeast Asian Games (SEAG) sa higayon nga mouli na kini.

Matod ni Talisay City Mayor Gerald Anthony Gullas nga kini isip pasidungog ug pasalamat na ngadto kang Andrew Kim Remolino, silver medalist sa SEA Games triathlon niadtong Dominggo, Disyembre 1.

Matud ni Gullas nga tulo ka Talisaynon ang nadala sa SEAG, usa kanila ang na-injured, samtang ang laing usa nga si Larry Avila nagpaabot pa sa iyang event sa shooting competition.

“I will talk to the city council, I think it has an ordinance already that they should be recognized when they comeback, naa nay cash. We will recognize when he comes back,” saysay ni Gullas.

Ang nakab-ot nga kalampusan ni Remolino nakapalig-on sa tinguha ni Gullas nga mopahigayon og sports summit ang dakbayan ilabi na sa elementarya diin hataas pa og kahigayona nga mapalambo ang matag kahibalo sa mga bata sa natad sa paugnat sa kusog.

“Kon mahibaw-on nato kon kinsa ni atong mga athletes, mapa-accredit nato ubos sa sports commission aron kahibalo nata kinsay ipadala sa national competitions,” matod ni Gullas.

Apan alang kaniya nga usa sa pinaka-importante mao ang pagpaubos sa mga trainers o coaches sa dakbayan sa atol sa subsob nga training.

“To bring in trainers to train our trainers kay lisud man kaayo nga sige lang ta padala og national coaches ug national trainers, but wala tay trainers dire nga pirme maka-hands on sa mga bata, I think, the next move under the Talisay government and sports commission will be to make seminar to train our coaches,” pagpasabot ni Gullas. (FMD)