Namatay diha-diha ang retired police human gi-ambush sa riding-in-tandem sa dayong pagsulod sa ilang gate alas 7:10 sa gabii sa Lunes, Pebrero 13, 2023 sa sityo Cogon, Barangay Cogon Cruz, dakbayan sa Danao.

Ang biktima giila nga si Quirino Viscayno Vasquez, 65, minyo, jailer kaniadto sa Danao City Police Station, gideklarar nga dead-on-arrival (DOA) sa tambalanan sa Danao City.

Atol niining pagsuwat, wala pa mailhi sa kapulisan ang duha ka mga gunman nga nagsakay sa motorsiklo nga way plaka, adunay kolor nga itom ug green.

Si Police Senior Master Sgt. Raymund Bacordo, imbestigador sa Danao City Police Station, nga nahinabi sa Superbalita Cebu, nagkanayon nga ilang gisubay ang motibo nga personal grudges ug kasungian sa yuta.

Sila si Vasquez ug Edith nagkuyog atol sa hitabo. Si Edith nisaysay ngadto sa imbestigador nga igo lang sila nga naabot sa ilang balay sakay sa ilang motorsiklo.

Siya nikanaog aron sa pag-abli sa ilang gate.

Mao na lay namatikdan sa asawa nga giduol ang iyang bana sa duha ka mga tawo nga nagmotorsiklo, ang angkas nipusil kang Vasquez sa makadaghan.

Nabunalan pa ni Edith ang usa sa mga gunman gamit ang helmet ug giingong gipabuthan sab siya una pa nisibat ang mga mamumuno.

Maayo na lang nga wa siya naigo.

Duha ka mga samad pinusilan ang nakita sa ulo sa retiradong pulis, usa usab ang niigo sa iyang aping.

GISUNDAN

Tug-an ni Edith nga nakamatikod na siya sa duha ka mga killer sa wa pa ang pagpamusil nga nagsunodsunod kanila hangtod na sa paghiabot sa ilang balay.

“Gikan ni sila nanagkot sa sementeryo. Nakabantay na man daw sila nga naay nagsunodsunod, hangtud sa ilang pag-uli,” matud pa ni Bacordo.

Gisubay sa kapulisan ang personal grudge nga motibo, ilabi na sa taho nga dili maayo og relasyon ang biktima tali sa ilang mga silingan.

Laing motibo mao ang away sa yuta kay nagkabangi sila sa ilang ubang paryente.

Nakig-alayon ang kapulisan sa silingan sa biktima nga adunay CCTV camera ang balay diin niagi sa tungod ang biktima ug mga killer aron ilang matun-an ang mga kuha niini agi’g giya sa imbestigasyon.

Nagtuo si Bacordo nga ‘gun-for-hire’ ang gunmen tungod sa kapaspas ug limpyo ang ilang trabaho.

Ang mga sakop sa Scene of the Crime Operation (SOCO) nakarekuber sa crime scene og duha ka mga bala nga ningbuto, laing upat ka mga kabhang.