NISUGYOT ang National Historical Commission of the Philippines (NHCP) og P10 milyones alang sa retrofitting sa karaan nga Archdiocesan Museum of Cebu isip kabahin sa pagpangandam sa kasaulogan sa ika-500 nga anibersaryo sa pag-abot sa Kristiyanismo sa Sugbo sa 2021.

Si Dr. Rene Escalante, chairman sa NHCP, nibutyag nga aprobado na sa National Economic and Development Authority (Neda) ang ilang proposal ug naa na kini karon sa Department of Budget and Management (DBM).

Sumala niya sa higayon maaprobahan na kini sa DBM ug maapil sa budget nga isumitir sa Presidente alang sa 2020, i-finalize nila ang aktwal nga plano alang niini.

Matod niya, ubos sa retrofitting, palig-unon ang atop, bungbong ug trusses niini.

“We want to focus on the structural (integrity) because that is the first step that we normally do. We want to make the building stable. So that just in case there would be natural calamities, the building will not collapse,” sigon ni Escalante.

Si Padre Brian Brigoli, chairman sa Cebu Archdiocesan Commisson for the Cultural Heritage of the Church, niingon nga sila ang nisumitir og formal request sa NHCP uban sa National Commission for Culture and the Arts (NCCA), nga i-restore ang museum kay gikonsiderar kini nga heritage structure isip kanhi rectory sa Cebu Metropolitan Cathedral.

Sugod niadtong Sabado, Hunyo 15, hangtod sa Lunes, Hunyo 17, nag-ocular inspection na ang NCCA sa museum.

Matod ni Brigoli nga mag-agad sila sa NHCP ug NCCA kon kanus-a masugdan ang restoration sa museum, apan andam na sila sa CACCHC sa tanang gikinahanglan nga documentations.

“So, its up to them kay dili pa man gyud ta kaseguro kon unsa pa ang laing isyu sa old structure nga among gi-present. Unya naa ra diay sila’y makit-an sa ilahang assessment nga kinahanglan pa," pasabot ni Brigoli.

Siya nidugang ang museum nga nahimutang tupad sa Cathedral, nagbarog sukad niadtong 1800 ug gidensiyo si Bishop Santos Gomez Marañon, nga mao usab ang nagdesinyo sa Cathedral.

Sa museum naka-display ang ubang personal nga mga gamit ni anhing Cebu Archbishop emeritus Ricardo Cardinal Vidal ug karaang ecclesiastical nga mga gamit sa simbahan. (SCG)