PATAY ang usa ka sakop sa force multiplier o kaabag sa mga pulis sa pagpatunhay sa kalinaw sa Dakbayan sa Talisay human nabangga ang iyang motorsiklo sa nagpundo nga e-bike sa dalan sa Barangay Cansojong.

Si Police Major Gerard Ace Pelare, hepe sa Talisay City Police Station, niila sa namatay nga si Michael Plotiño, hingkod, molupyo sa taga Barangay Biasong, Talisay City.

Sa imbestigasyon sa Talisay Pilice Station nasayran nga gikan sa Barangay Tanke si Plotiño ug padulong na unta mopauli sa ilang balay.

Apan pag-abot sa Cansojong, nawagtang ang kontrol ni Plotiño sa iyang motorsiklo hangtod nga nabangga ngadto sa usa ka e-bike nga gi-park sa daplin sa karsada.

Si Plotiño nabunal sa dalan. Dali kini nga gitabang apan nakabsan sa iyang kinabuhi.

Matod ni Pelare nga posible nga nakatulog si Plotiño sa pagmaneho hangtod nga nadasmag.

Dugang ni Pelare nga padayon ang ilang imbestigasyon kung aduna bay tulubagon ang nanag-iya sa e-bike nga nabanggaan.

Ang namatay sakop sa Federation of PNP Accredited NGOs of the Philippines (FPAN). (BBT)