NIHANYO sa mga miyembro sa City Council si Talisay City Mayor Gerald Anthony "Samsam" Gullas Jr. nga suportaran sa iyang "8-point Agenda" diin nag-una niini ang edukasyon.

Atol sa inaugural session sa konseho kaganihang Martes sa buntag, Hulyo 2, si Gullas nihangyo alang sa pag-gahin ug budget sa scholarship program sa mga senior high students nga taga Talisay nga maayo sa usa ka subject o honor, sama nalang sa Math, para mapaeskwela kini og libre sa usa ka prominente nga unibersidad sa dakbayan sa Sugbo.

Ang mga sakop sa Talisay City Council, nga gipangulohan ni Vice Mayor Alan Bucao, kay puros mga alyado ni Gullas sa niaging piniliay.

Gawas sa giplano niini nga scholarship program, gipahibalo sad ni Gullas na libre na sa mga bayronon sa mga motungha sa Talisay City College (TCC), diin ang nasudnong kagamhanan ang mo- subsidized sa tuition ug mga miscellaneous fees.

Ang TCC kay usa lang sa mga local colleges lukop nasud nga gihatagan ug pagtugot sa Commission on Higher Education (Ched) nga librehon ang ilang tuition para sa ilang estudyante.

Ang lokal nga kagamhanan sa siyudad sa Talisay nigahin na usab og P20 milyones alang sa TCC.