Adunay 16 ka mga lokalidad sa lalawigan sa Sugbo ang nagmuntar og satellite registration areas ug moatiman niadtong adunay transaksiyon sa Commission on Elections (Comelec).

Sa unang distrito, nalakip sa mga lokalidad nga nipahimutang og satellite registration areas ang dakbayan sa Talisay sa Starmall, Lawaan I; sa lungsod sa Minglanilla sa Belmont One Mall ug Lungsod sa Alcoy sa barangay hall sa Pugalo, Atabay, Daan Lungsod ug Nug-as.

Ang lungsod sa Asturias nga sakop sa tersero distrito nipahimutang og satellite center sa barangay halls sa San Roque ug Owak samtang sa lungsod sa Barili sa Mantayupan covered court.

Sa 4th District mahimong modangop sa mga identified nga basketball courts sa lungsod sa Tabogon samtang gipahimutang usab sa health center, municipal hall ug covered court ang pagrehistro sa mga konstituente sa Tabuelan.

Sa fifth district anaa sa barangay hall sa lungsod sa Compostela, Liloan, Poro, San Francisco, Tudela, ug dakbayan sa Danao.

Sa sixth district gipahigayon sa barangay halls ang pagrehistro sa lungsod sa Consolacion samtang sa 7th district sa Lungsod sa Alcantara ug Malabuyoc lang ang nipahimutang og registration area sa covered court ug barangay halls.

Makita sa hulagway nga gidagsa City Wing sa SM Seaside Cebu City diin gipahigayon ang voter registration. (ANV, Amper Campaña)