LAWAS sa seaman nga na-missing niadtong Marso 2, 2021 napalgan human nilutaw alas 3:30 sa hapon sa Biyernes, Pebrero 5, 2021, sa kadagatan Brgy. Talo-ot, lungsod sa Argao, habagatang Sugbo.

Ang iyang pagkahanaw gitaho sa iyang mga kauban sa barko ngadto sa Philipine Coast Guard (PCG).

Ang biktima giilang si Arnulfo Languido, 58, minyo, taga Brgy. Poblacion East, lungsod sa Moalboal.

Si Police Patrolman Duin Lumapas sa Argao Police Station nga nahinabi sa Superbalita Cebu nagkanayon nga si Languido giila sa iyang igsuon nga si Rellosa Alcover alas 12 sa kaadlawon Sabado.

Si Lumapas nagkanayon nga ang kapitan sa barko nga si Christopher Megrenio, mitug-an sa ilang imbestigador nga si Languido ilang gipa-blotter sa Coast Guard niadtong Marso 2 human kalit nga nahanaw samtang sila nagdunggo sa lungsod sa Minglanilla.

Ang lawas ni Languido gidala sa usa ka punerarya sa dakbayan sa Carcar alang sa pag autopsy sa PNP Crime Laboratory aron pagsuta kon unsay iyang namatyan. (GPL)