MGA security manager sa malls, hotels ug uban pa nga establisemento sa Dakbayan sa Mandaue gipaubos sa awareness ug refresher course sa Mandaue City Police Office, Myerkules sa buntag, Abril 24.

Kini may labot sa pag-ila sa nagkadaiya nga klase sa mga bomba, Improvised Explosive Device (IED) ug uban pa.

Ang kalihukan gihimo tungod sa pagpamomba sa mga hotel ug simbahan sa Sri Lanka niadtong Domingo, Abril 21, diin gatusan ang namatay ug nangaangol.

Gipahinumduman usab sila sa unsa pay angay idugang sa gipatuman nga seguridad sa sulod ug palibot sa ilang mga edipisyo.

Gani gitambagan ni MCPO director, Police Colonel Julian Entoma, ang mga mall ug hotel security heads nga gikinahanglan nga anaa silay x-ray machine alang sa mga bagahe, walk through metal detector ug mga covert security personnel.

Gipaniguro usab nga adunay mag-monitor sa ilang closed-circuit television (CCTV) camera.

Gitug-an sa director sa MCPO nga bisan kon walay nadawat nga hulga sa mga pagpangatake ang nasud, apan iyang gitambagan ang mga security manager nga di mokampante, mas estrikto ug mas magbinantayon diha sa mga mosud-gawas sa ilang mga edipisyo.

“Giapil nato ani ang sa mga restaurant or mga establishment nga mo-cater og daghang mga tawo, pagpa-aware nato nila sa mga kind of bombs, IED’s pagpa-refreshed sa ila ug pag-enhanced, because of the recent incident sa Sri Lanka,” pagpasabot ni Entoma. (FMD)