KARONG Sabado, Septiyembre 25, ang liboan ka senior citizens sa Dakbayan sa Sugbo makadawat na usab sa ilang financial assistance nga tag P3,000 matag usa gikan sa lokal nga kagamhanan.

Ang pagpang-apud-apod sa maong ayuda nagrepresentar sa mga buwan sa Hulyo, Agosto ug Septiyembre 2021.

Samtang, nahuman na ang pagpanghatag sa City Hall sa financial assistance alang sa persons with disability (PWDs).

Sama sa naandan, ang distribution pinaagi sa house-to-house sanglit ang dakbayan y ilawom pa sa status nga general community quarantine (GCQ).

Si Mayor Edgardo Labella nilagda sa Executive Order No. 144 sa wala pa siya nag-medical leave niadtong Septiyembre 20 para maoy maghatag og giya sa distribution sa ayuda sa senior citizens nga nagbalor og P1,000 matag buwan.

Gitahasan ni Labella ang Office of Senior Citizens Affairs (Osca), Department of Social Welfare and Services (DSWS), City Treasurer’s Office lakip na ang PNP ug AFP sa pagpatuman sa maong EO uban sa abag sa mga opisyal sa 80 ka barangay.

Ang senior citizens nga nitaliwan sa laing kalibotan sa Hulyo makadawat og P1,000 atag usa, P2,000 ang namatay niadtong Agusto ug P3,000 kon sa buwan sa Septiyembre na siya nakabsan sa ilang kinabuhi.

Si Labella niawhag ngadto sa mga lolo ug lola sa pag-andam sa ilang indetification card (ID) nga giisyu gikan sa OSCA, pagsul-ob sa face mask ug ballpen atol sa pagkobra sa financial assistance. (PAC)