KAPIN sa walo ka gramos nga gituohang shabu, mahait nga mga hinagiban, cellphone, ug ubang drug paraphernalia ang nakuha sa mga awtoridad atol sa greyhound operation didto sa Mandaue City Jail kagahapon sa kadlawon.

Kini mao na ang ikaduhang greyhound operation sa gihimo sa pasilidad ning buwana.

Kagahapon, ang operasyon gipangulohan sa Philippine Drug Enforcement Agency (PDEA) 7, Mandaue City Police Office (MCPO), Special Weapons and Tactics (SWAT) inabagan sa Bureau of Jail Management and Penology (BJMP).

Matod ni P/CInsp. Mercy Villaro nga mokabat ngadto sa 8.12 gramos sa gituohang shabu nga may DDB value nga kapin sa P40,000 ang nakuha gikan sa selda sa inilang drug personality nga si Steve Go.

Gawas sa drugas, nakakuha sab ang mga awtoridad og mga nagkadaiyang paraphernalia sama sa lighter, tinfoil ug tooter, usa ka Android cellphone, cellphone chargers ug headset, kutsilyo,mga gagmayng ice pick, digital nga timbangan ug salapi nga mokabat ngadto sa P64,000.

Nasuta sa Superbalita Cebu gikan ni Villaro nga ang drugas nga nasakmit gisud sa usa ka LED nga bombilya.

Giingong nahibong ang mga awtoridad nganung adunay napundir nga bombilya sa selda imbes nga kini ilabay.

Ang tanang mga kontrabando nga nasakmit matod pa gikan sa male dormitory ilabi na sa Therapuetic Community Building diin kasamtangang gitanggong si Go.

Way mga kontrabando nga nakuha gikan sa female dormitory.

Mokabat ngadto sa 24 ka kawani sa MCPO ang nisalmot sa operasyon, 10 ka NUP nga kawani, siyam ka kawani sa PDEA 7 ug upat gikan sa SWAT.

Sumala ni Villaro nga nagsugod ang operasyon mga alas 5 sa buntag ug nahuman pasado alas 7 sa buntag.

Sayo ning buwana, way mga kontrabando nga nasakmit ang operatiba sa ilang greyhound apan natingala kini nganong may mga charger nga nasakmit apan way mga cellphone nga nakuha. (JPP)