NADAKPAN sa mga pulis sa Sawang Calero Police Station sa Cebu City Police Office (CCPO) ang usa ka 51 anyos nga ginang nga nisuway sa pagpalusot sa duha ka putos nga gituohang shabu nga iyang gisuk-suk sa slice bread alas 7 gabii sa Lunes, Abril 12, 2021.

Ang suspek giila nga si Jocelyn Villarico Daclison, 51, taga Block 4, Tupas Street, Barangay Sawang Calero, Siyudad sa Sugbo.

Bitbit ni Daclison ang usa ka putos sa slice bread nga alang unta sa iyang bana nga nabilanggo usab sa maong police station sa kaso sa illegal nga drugas.

Apan sa dihang gihiling kini sa jail officer, nakaplagan ang duha ka putos nga gipatung-an sa slice bread nga adunay mga gamit sa pag suyop sama sa tin foil ug disposable lighter.

Wa na maka himakak si Daclisan sanglit nasakpan diha sa iyang atubangan ang maong kontrabando.

Samtang sa dakbayan sa Toledo, usa ka 29 anyos nga lalake napusasan atol sa buy bust sa sitio Baybay 1, Barangay Poblacion alas 2 sa hapon sa Abril 12.

Ang nadakpan giila nga si Rachel Villasor Rotulo, nagpuyo sa maong dapit. Si Rotulo nakuhaan og 23 gramos sa gituohang shabu nga mokantidad og P156,400,00.

Matod sa hepe sa Toledo Police Station, Police Lieutenant Colonel Junnel Caadlawon, nga dugay na nga gipanid-an sa iyang mga sakop si Rotulo. (AYB)