MAAYONG pagkaugdaw sa usa ka Toyota Grandia nga igo lang untang ipaayo ang side mirror sa usa ka carshop sa Sitio Datag, Brgy Maribago dakbayan sa Lapu-Lapu.

Nalakip kini pagkasunog sa laing upat ka mga sakyanan ug carshop nga gipanag-iya sa usa ka Korean national nga si Kang Gilwon pasado alas 9 sa Miyerkules sa gabii, Agusto 2.

Ang tibuok Seoul Car Shop lakip na ang ubang sakyanang naka park sa ilang compound naugdaw.

Ang Grandia giingong ipaayo unta gumikan sa gamayng problema sa side mirror, naugdaw na hinuon .

Ang mga naugdaw naglakip sa usa ka towing car, Hyundai Porter, Hyundai Starex, Kia Bongo ug usa ka Yamaha Mio nga scooter.

Matod ni SFO3 Hadji Samonte, imbestigador sa Lapu-Lapu City Fire District, wa nay nakahikutar pa sa mga trabahante sa pagsalbar sa mga sakyanan dihang niulbo ang sunog gumikan sa ilang karatol.

Alas 9:25 nadawat sa kabomberohan ang alarma ug pag-abot nila sa carshop, dako na ang kayo.

Sa inisyal nga imbestigasyon, nasutang nagsugod ang kayo sa unang andana sa carshop nga gihimong bodega sa mga trabahante.

Padayon pa ang pakisusi sa kabomberohan sa hinungdan sa sunog apan posible kining may kalambigitan sa kuryente. (GCM)