Gilusad sa Gwen Garcia for Senator Movement ang pagtigom og mga pirma aron awhagon ang gobernador sa Sugbo nga magpapili alang sa pagka senador sa Mayo 2022 presidential elections.

Si Edward Ligas ug Maria Pino maoy nangulo sa maong kalihukan diin nakatigom na sila og kapin o kulang 500 na ka mga signature gikan sa mga molupyo sa sityo Silangan sa Barangay Tinago human sila nipirma para sa ilang suporta, Hunyo 17, 2021.

“Kining atong gibuhat mao ang pag-launch sa signature campaign pag-awhag ni Governor Gwen sa pagka-senador,” padayag ni Ligas.

Siya nagkanayon nga moduaw sila a ubang barangay sa dakbayan ug silingan nga mga lungsod ug dakbayan sa pagdasig sa ubang botante nga mosuporta kang Garcia. / PAC