NASUTA gikan sa usa ka opisyal sa Philippine Drug Enforcement Agency sa Central Visayas (PDEA 7) nga usa ka sinaligan sa drug lord ang mastermind sa duha ka mga suspetsado nga nadakpan sa drug raid didto sa dan N. Bacalso Avenue, Sityo San Vicente, Barangay Bulacao, dakbayan sa Sugbo pasado alas 9 sa gabii sa Miyerkules, Agosto 10, 2022.

Apan ang PDEA 7 nagdumili pa paghatag sa ngan sa mao'ng drug lord nga padayon pa'ng naglihok sa dakbayan aron dili masanta ang ilang pagahimuon nga operasyon batok sa naulahi.

Ang maong ronda nga gipangulohan ni narcotic agent Jessie Cabutotan miresulta sa pagkasikop ni Rey Steven Buenavista, 29 anyos, ug molupyo sa dapit, ug Jonel Añasco, 44 anyos, taga Buenavista, Bohol.

Si Buenavista maoy target sa operasyon apan naapil si Añasco.

Si Añasco miangkon nga bag-o lang siyang nakagawas sa prisohan sa imaging buwan human siya mabilanggo og 10 ka tuig gumikan sa kaso'ng murder ug qualified theft.

Matud niya nga iyang napatay ang tawo nga bag-o lang niya nakaila niadtong Hulyo sa tuig 2012 sa may Tagunol road, dakbayan sa Sugbo.

Samtang si Buenavista natanggong usab sa Cebu City Jail niadtong 2020 sa kasong pagpamaligya ug paghupot ug ginadiling drugas apan nakagawas sa buwan sa Abril karon'g tuiga.

Ang duha nasakmitan og 105 gramos sa gidudahan'g shabu nga mokantidad og P714,000 subay sa standard drug price.

Sila mihimakak nga ila ang nasakmit nga mga kontrabado og mi-rason nga igo lang silang gisugo pagpahatod niini.

Si Leia Alcantara, tigpamaba sa PDEA 7, nagkanayon nga moabot sa dul-an duha ka semana ang ilang pag-monitor ni Buenavista una nila gipahigayon ang ronda.

Matud niya nga makonsiderar nga city-wide high value target si Buenavista sanglit lukop dakbayan sa Sugbo ang iyang ilegal nga operasyon. (BBT, TPT)