USA ka Filipino-Chinese ug unom ka mga trabahante gipangdakop sud sa Mactan-Cebu International Airport (MCIA) Terminal 1 arrival area sa Miyerkules, Enero 13, 2021 human nasuta nga peke ang mga letter of acceptance (LOA) nga ilang gidala.

Ang LOA gikinahanglan sa mga di taga Sugbo kon mosulod sila dinhi samtang gipatuman pa ang modified general community quarantine (MGCQ) taliwa sa hulga sa coronavirus disease (Covid-19).

Nasuta nga ang ilang gidala nga LOA nga gipatuo nga gikan sa Dakbayan sa Lapu-Lapu peke base mga pirma.

Giila ang Filipino-Chinese nga si Weisong Liao, 37, taga Manila City, samtang ang unom nga mga kauban mao sila si Reynato Laelo, 49; Joselito Caingat, 34; Leo Caingat, 36; Jayson Gregorio, 36; Nelson Barnatia, 36; ug Ariel Alarcon, 28, pulos taga Nueva Ecija.

Naabot sila mga pasado alas 10 sa buntag sa MCIA.

Matod ni Lapu-Lapu City Mayor Junard Chan, dihang gipresenta na nila ni Liao ug mga mga kauban ang ilang mga dokumento, nasuta sa representante sa Dakbayan sa tugpahanan nga peke ang ilang gikuptan nga LOA.

“Naa man gayud tay tawo nga ibutang diri just to check nga kumpleto ba ang ilang mga dokumento before sila mosulod diri sa atoang Siyudad,” matod ni Chan.

Gibutyag sa mayor nga wa nasubay sa sakto nga format sa Lapu-Lapu ang LOA sa mga dinakpan ug nigamit pa sila sa digital signature sa mayor.

“Gigamit nila e-signature. But mailhan gihapon kay bisag e-signature siya, adunay countersign sa original nga countersign either sa secretary of the mayor or the city attorney. Makaingon ta nga gi-forge nila ang maong pirma,” matod ni Chan.

TRABAHO

Gitataw ni Liao nga trabaho nila nga magtaod og mga karatola o signage ug ilang tumong sa pagbiyahe sa Lapu-Lapu.

Mao usab kini ang gibutyag sa unom ka mga kauban ni Liao, apan wa sila nitug-an kon unsa nga kompaniya nga nikontrata kanila.

Nagkanayon si Chan nga niagi og agency sila si Liao aron makakuha og LOA. Apan gipasabot sa mayor nga di na kinahanglan pa nga moagi og agency sanglit mahimong makuha direkta sa lokal nga kagamhanan.

Depensa ni Liao nga wa siya magdahom nga di tinuod ang mga LOA nga ilang gihuptan.

Wa usab siya kahibawo nga sa lokal nga kagamhanan kini kuhaon sanglit mao kini ang unang higayon nga mibiyahe siya sa Sugbo karong panahon sa pandemiya. “Di ko alam din na peke yun. Kasi Covid, di ba? Hindi ako nagpunta sa Cebu. First time na magpupunta ako sa Cebu. So hindi ko alam paano yung papunta,” matod ni Liao.

Samtang ang laing unom, kinsa wala mosugot nga indibidwal nga makuhaan og habig, niingon nga wala silay kalibutan nga peke ang ilang mga LOA sanglit sa Ninoy Aquino International Airport na nila nadawat.

Matod ni Atty. James Sayson sa City Legal Office nga kon mapamatud-an nga sad-an ang mga dinakpan sa pagpameke sa LOA, posible sila mapriso og dili moubos sa unom ka buwan ug aduna P1 milyon nga multa.