Vendor patay nang niabot sa ospital human pusila sa makadaghan samtang natulog uban sa kapuyo alas 10 sa gabii sa Biyernes, Agusto 20, 2021 sa Sitio Cansusi, Brgy. Tapon, lungsod sa Dalaguete.

Ang biktima giila nga si John Leonard Repullido Membrillos, 24, dunay kapuyo, taga Magsaysay st., Brgy. Pasil, dakbayan sa Sugbo.

Si Police Corporal Jim Vincent Pacaldo sa Dalaguete Police Station nga nahinabi sa Superbalita Cebu nagkanayon nga si Membrillos natulog na uban sa kapuyo nga si Sherry Mae Getutua.

Ang kapuyo nibutyag nga nahinanok na sila niadtong higayuna dihang dunay armadong tawo nga nipugos sa pagsulod sa ilang balay pinaagi sa pagguba sa pultahan.

Dihang nakasulod, nipusil kini kang Membrillos sa makadaghang mga higayon tumong sa kalawasan.

Ang mga pulis sa Dalaguete daling ningdala kang Membrillos sa Argao District Hospital, apan patay na kining niabot.

Tulo ka mga kabhang sa kalibre .45 nga pistola ang narekuber sa kapulisan sa crime scene.

Si Sherry Mae nitug-an nga Enero ning tuiga mibalhin silag puyo sa Dalaguete.

Gibutyag niini nga vendor og itlog ang iyang kapuyo apan dunay tawo nga gikaaway sa Pasil, Dakbayan sa Sugbo hinungdan nga milarga sila Dalaguete.

Ang kapuyo ingon man mga silingan nakabantay nga human sa buto-buto dunay, motorsiklo nga gituohang gisakyan sa killer nga daling nipalayo sa dapit.