PORMAL nang nilingkod ang bag-ong hepe sa kapulisan sa siyudad sa Talisay karung buntaga, Hulyo 5, 2019.

Si Police Brigadier General Debold Sinas, panguo sa Police Regional Office-Central Visayas (PRO 7) mibisita sa buhatan ni Talisay City Mayor Gerald Anthony "Samsam" Gullas Jr. para ipaila-ila si P/Major Orlando Carag Jr., ang bag-ong hepe sa siyudad sa Talisay.

Si Carag pormal nga muhulip ni P/Col. Marlu Conag, nga bag-o lang gi-promote isip hepe sa Provincial Intelligence Branch sa Cebu Provincial Police Office (CPPO).

Usa sa ilang mahisgutan ang pagdugang tulo ka police community precincts sa Talisay tungod kay daghan na ang populasyon sa maong siyudad.

Usa ka police precinct ang ibutang sa Barangay Tanke ug laing duha sa Barangay Tabunok ug bukirang barangay aron dali nalang unya ang pag dangop sa kapulisan.

Mag dugang usab si Sinas og personnel sa Talisay nga kasamtangan adunay 82 ka pulis tungod kay kinahanglan moabot sila og kapin sa usa ka gatus sa usa ka station.

Dakong uyon niini si Gullas ug andam siya nga mo suporta kung unsay ikaayo sa mga Talisaynon.

Gusto sad ni Gullas na tutokan sa bag-ong hepe ang pag-puhag sa ilegal nga drugas nga padayon problema sa dakbayan. (AYB/WBS)