ANG pagpatukod og world-class tourist spot sa syudad sa Talisay maoy usa sa nag-una nga tinguha sa administrasyon ni Mayor Gerald Anthony Gullas.

Mao kini hinungdan nga sa miaging semana gituyo sa pagduaw sa mayor ang mga buhatan sa pipila ka senador aron magpatabang alang sa funding sa maong proyekto.

Gitug-an ni Gullas nga diha sa barangay Poblacion, tulo ka phases ang gitinguha niya nga pagpatukod sa world-class tourist destination.

Una ang central plaza, food court ug boardwalk nga sumpay sa landingan o liberation park.

Matud sa mayor nga gawas sa ilang pundo nga gikan sa supplemental budget ning tuiga, ilakip usab sa annual budget sa sunod tuig, ug nangayo usab og tabang og dugang pundo sa kanhi mayor ug karon 1st district representative, Eddie Gullas.

Lakip sa iyang giduol og nipasalig nga motabang, sila si senador Cynthia Villar, Grace Poe, Ronald ‘Bato’ dela Rosa, Bong Go, Sherwin Gatchalian, Miguel Zubiri, Nancy Binay, Imee Marcos, Sonny Angara, Pia Cayetano ug Francis Tolentino.

Matud ni Gullas nga ang maong nga senador, ang nisaad na nga motabang sa maong proyekto sa syudad.

Gi-finalize nalang karon ang mga specific sa design alang usab sa tukma nga gikinahanglan nga pundo niini.

Giingon nga nipadayag na usab nga motabang ang kagamhanan sa probinsya sa Sugbo, pinaagi ni gobernador Gwendolyn Garcia.

Makigtagbo ang mayor kang Tourism secretary Bernadette Romulo-Puyat ug magpatabang sa Department of Tourism sa rehiyon.

Sa pasiuna nga budgeting, gilantawan nga mogasto kini og dul-an o kapin sa 100 milyones pesos ang tulo ka phases.

“Actually one of my main thrust in my administration is to create a World class tourist spot in povlacion, we have a design, we only need the funding. Hopefully mahimo gyud, I am planning to meet secretary verna sa tourism, ang director sa tourism sa region, para mapakita nila ang design, kay makatabang man sad sila,” gipasabot ni Gullas. (FMD)