SA UNANG higayon, ang eleksiyon sa usa ka lungsod sa Sugbo dunay nakaestambay nga tangke de giyeriya ug K-9 dogs.

Usa ka military tank o tanghe de giyera ug personnel gikan sa Armed Forces of Philippines (AFP) Central Command ang nakaestambay sa bukirang barangay sa Magsico, diin sentrong dapit kon dunay alarma sa kabukiran atol sa eleksiyon karon.

Siyam ka K9-dogs ug Special Weapons and Tactics team dugang gipadala sa San Fernando kagahapon, Mayo 12, isip suporta sa pwersa sa kapulisan ug militar nga daan nang nadistino sa lungsod human sa sunodsunod nga kagubot ug kaso sa pagpamatay.

Si Police Regional Office (PRO) 7 Director Debold Sinas nitambag sa mga dumadapig sa kandidato nga mokalma.

Gisusi ni Sinas ang police stations sa habagatan sa Sugbo, lakip sa San Fernando, kagahapon, Mayo 12, aron pagsubay sa election-related incidents.

Si San Fernando Police Station chief Police Major Lymel Pasquin niingon nga lakip sa ilang gibantayan mao ang vote buying ug pagpatuman sa liquor ug firearms ban.

Samtang sa San Francisco, isla sa Camotes, bisan sa pagkaapil sa lungsod sa elections watchlist areas, mopadayon sa pagsilbi ang 117 ka mga miyembro sa electoral board (EB) karong adlawa, Mayo 13.

Kini ang gikompirmar ni acting San Francisco election officer Benedicto Santiago sa dihang nahinabi sa SunStar Cebu kagahapon, Mayo 12.

“Fortunately, none of them refused and all of them will serve in the midterm polls. As of this time (3 p.m. sa Dominggo), our peace and order situation is okay,” matod ni Santiago.

Ang Commission on Elections (Comelec) niila sa 20 ka mga lungsod ug siyudad nga nalista isip “hotspots.”

Ang San Francisco, uban sa mga lungsod sa Asturias, Daanbantayan, Dumanjug, Pinamungajan, Ronda, San Fernando ug Tuburan gibutang ubos sa orange category.

Ubos sa orange category ang mga lugar nga adunay kasaysayan sa election-related violence o adunay presensya sa politikahanong panagribal, apil usab ang presensya sa seryosong armadong pagpanghulga.

Niadtong Abril 4, gidakop sa mga sakop sa Provincial Intelligence Branch and the Provincial Drug Enforcement Unit si Mayor Aly Arquillano ug ang iyang igsuong si Bise Mayor Alfredo Arquillano Jr. tungod sa ilegal nga paghupot og mga armas ug granada.

Ang managsuong Arquillano nakapiyansa sa Danao Regional Trial Court niadtong Mayo 2, pipila ka adlaw sa dili pa ang eleksyon. (JOB, RTF sa SunStar Cebu)