MAAGIAN na ang giayo nga parte sa taytayan sa Mananga.

Gibuksan alas 8:40 Sabado sa buntag, Septiyembre 14, 2019 ang parte sa taytayan nga giayo sulod na sa usa ka tuig.

Ang mga sakyanan nga gikan sa habagatan sa probinsya sa Sugbo padung sa Dakbayan sa Sugbo ang dili na kinahanglan pa nga makig-share sa pikas nga bahin sa taytayan.

Kahinumduman nga sulod sa kapin usa ka tuig nga ang parte sa taytayan nga alang unta sa mga sakyanan nga gikan sa amihanan nga bahin, padung sa habagatan, ang gigamit isip two-way.

Gitug-an ni City of Talisay Traffic Operations Development Authority (CT-Toda) head, Jonathan Tumulak nga Biyernes sa alas 5 sa hapon gihuman sa contractor ang pagpaaspalto.

Dali usab napangitaan og solusyon ang problema kalabot sa dili patag nga dan diha sa taytayan.

Sa pagsusi sa Department of Public Works and Highways, ang mga nakita nga pipila ka liki na giingon nga anaa lang sa ibabaw nga bahin ug dili kuyaw.

Atol sa pagbukas, anaa sila Tumulak ug ang kadagkuan sa Department of Public Works and Highways Central Visayas.

Matod ni Tumulak, gipaniguro ni Edgar Tabacon, regional director sa DPWH, luwas agian ang taytayan sa tanang klase sa sakyanan.

Hinungdan nga nipahibalo si Tumulak sa Cebu City Traffic Office (CCTO) nga mamahimo na nga makaagi ang mga bus agi sa taytayan sa Mananga.

Posible nga sulod ning semanaha magtagbo sila sa kadagkuan sa CCTO, CT-Toda, stakeholders ug mga operator sa mga bus.

Kini alang sa himuong panagsabot kon pabalikon ba na sa pag-agi ang mga bus diha agi sa taytayan sa Mananga o padayon nalang sila nga diha sa South Coastal Road.

Giangkon hinuon ni Tumulak nga na-obserbaran nila nga gikan sa Mananga Bridge padung sa Tabunok Flyover hapsay ang dagan sa trapiko.

Apan pag-abot sa may Bulacao area, ilabi na duol sa boundary sa Talisay City ug Cebu City, mosugod na sa paghuot ang trapiko.

Kini karon ang usa sa gipangitaan sa CT-Toda ug ilakip sa ilang meeting uban sa taga CCTO. (Superbalita Cebu)