Gipahimangnoan ni Lapu-Lapu City Mayor Junard “Ahong” Chan ang mga telecommunication companies nga dili na mo-renew ang City Government sa ilang business permit kon sila mapakyas sa pagwagtang sa spaghetti o dangling wires sa dakbayan hangtod sa Disyembre 16, 2022.'

Si Chan niingon nga gihatagan niya og ultimatum ang mga telcos kauban ang Mactan Electric Company (Meco), sanglit dul-an na sa usa ka tuig sukad sa pagkuso-kuso sa Bagyong Odette apan ang mga wire nga naglambod makita pa sa siyudad.

Matud pa sa mayor nga nakamugna kini og daghang insidente sa trapiko sa siyudad, diin ang uban miresulta sa kamatayon sa pipila ka mga tawo.

“Mag-usa ka tuig nata gikan sa bagyong Odette. Wala sila’y pagpakabana, hinay kaayo ilang trabaho,” ingon niya, ug nidugang nga ang mga telco gikataho nga ningbiya sa mga wire dihang sila nakabalik sa mga serbisyo ngadto sa ilang mga kustomer.

Si Chan niingon nga kinahanglang maghiusa ang telcos sa pagtangtang sa ilang mga wire kay gikatakdang mobisita siya og balik sa kadalanan sa dakbayan karong Disyembre 16.

Ang mayor niingon nga ang City Government mobakwi o dili na mo-renew sa ilang business permit sa sunod tuig kon mapakyas sila sa paghawan sa spaghetti wires. /