TUNGOD sa programa sa Philippine Drug Enforcement Agency (PDEA) sa kaulohan nga ‘Isumbong Mo kay Wilkins (IMKW)’, nasikop ang tigpayuhot og druga sa Sityo Ibabao, Brgy. Mambaling, siyudad sa Sugbo niadtong Miyerkules sa gabii, Marso 23.

Usa ka nagpakabana nga silingan nisumbong sa IMKW hinungdan nga niabot sa director general sa PDEA ang taho nga nisangko sa paglusad og operasyon sa lokal nga ahensiya ug malampusong nasikop si Alger Abello , 44.

Si Abello nasakmitan og gidudahang shabu nga motimbang og 10 gramos nga dunay kantidad nga P68,000 subay sa street drug price (SDP).

Ang tigpamaba sa PDEA 7, Leia Alcantara, nibutyag nga ang pagdakop kang Abello nadugay human siya nilugnot dihang nakuhaan na og shabu ug kwarta nga maoy gipalit sa nagpailang poseur-buyer.

Dugang ni Alcantara nga si Abello way giapilang grupo sa ilegalista, apan siya kanhi napriso niadtong 2017 ug nabalhog sud sa duha ka tuig.

Samtang nasikop usab sa drug-bust sa Waterfront Police Station nga gipangulohan ni Police Major Henry Orbiso, hepe sa Waterfront Police, si Edward Reynes, 37, nagpuyo sa Sityo Laurente, Brgy. Tejero, siyudad sa Sugbo, sa alas 6:00 sa gabii sa Miyerkules, Marso 23.

Nasakmit nga shabu gikan kang Reynes gibanabana nga mobalor og P300,000 subay sa SDP.