DI PA matino sa PNP Crime Laboratory kon na-rape ba ang 16-anyos nga dalaga nga nakaplagang patay ug gilaplapan ang nawong sa Barangay Bankal, dakbayan sa Lapu-Lapu.

Gisalikway usab ni Supt. Benjamin Lara, medico legal officer ug pangu sa PNP Crime Lab, nga gigamitan og asido ang pagtangtang sa nawong sa biktima.

Matod ni Lara nga kon nigamit pa og asido ang mga mamumuno, naapil unta og ka sunog ang mga mata ni Christine Silawan.

Iyang gibana-bana nga labing minos tulo ka mga tawo ang nagbuhat sa krimen kay di kini mahimo sa nag- inusara o duha ka mga tawo.

Gikompirmar usab ni Lara nga dunay 30 ka mga samad si Silawan: Usa sa liog, 19 sa lawas ug siyam sa duha ka bukton.

Nagtuo siyang nisukol si Silawan base sa mga samad niini.

Ila usab nga gikuhaan og swab sample si Silawan alang sa DNA testing aron pagkompirmar nga siya ba gyud kay di na man maila ang nawong niini.

Samtang, gikondenar sa Commission on Human Rights (CHR) 7 ang linuob nga pagpatay ni Silawan.

Si Atty. Arvin Odron, pangu sa CHR 7, niingon nga dili makatarunganon ang pagpatay ni Silawan ilabi na nga minor de edad pa kaayo ni.

"This act desecrates human dignity and must be punished," sigon ni Odron.

Dugang ni Odron nga mupadala sila ug Quick Response Team para mutabang sa imbestigasyon sa kaso ni Silawan.(AYB/JKV)