NI-VIRAL sa social media ang pag-uwan og ice crystals niadtong Miyerkules sa hapon, Hulyo 3, sa Dakbayan sa Toledo.

Tulo ka mga barangay ang giuwan og ice crystals.

Sa video post ni Madznill Marata sa Facebook, nakita nga aduna’y dala nga ice crystals sa uwan nga nasinati pasado ala 1 sa hapon.

Ang Philippine Atmospheric, Geophysical and Astronomical Services Administration (Pagasa) Visayas nikompirmar usab nga posible kini nga mahitabo human miisyu og “ugly thuderstorm advisory” ang ilang ahensiya sa Toledo.

Usa sa features niini mao ang hailstorm o pag-uwan og ice.

Sagad mahitabo ang pag-uwan og ice crystals kon ubos ra ang panganod ug wa nay higayon nga mahilis kini sa di pa motugpa sa yuta.

Matod sa officer-in-charge sa Pagasa Visayas Engr. Al Quiblat nga di kini unang higayon nga aduna’y hailstorm sa Sugbo.

Tuig 2012 ug 2013 diin natala usab ang hailstorm sa lungsod sa Pinamungajan.

Sa pakisusi sa Superbalita Cebu, nasuta nga dili lang sa Barangay Lutopan nasinati ang hailstorm.

Nasinati usab kini sa Cambang-ug ug Sam-ang.

Matod ni Marata nga modagan ra sa duha ka minutos ang pag-uwan og ice crystals.

“Nidugdog siya pag-una dayon ni kilat nga pwerting kusoga. Then paghuman ni taligsik,” si Marata nagkanayon.

Dugang niya nga human sa kusog nga dugdog ug kilat, niuban sa talisik ang ice crystals diin susama kini kadak-a sa 25 centavos.

“First time jud ni nako,” si Marata nibutyag sa iyang 26 ka tuig sa kalibutan, unang higayon siya nakasinati niini.

Wa hinuoy gitaho nga dunay namugnang kadaut ang hail storm.

Sa ubang mga nasod, labina sa bugnaw og temperatura, kini makamugnag kadaut sama sa mga sakyanan kon dagko na ang crystals. /