ORMOC City, Leyte - Top 3 nga most wanted person sa Eastern Visayas nadakpan sa Ormoc City Police Office (OCPO) sa Quezon City.

Giila ang suspek nga si Michael Daclitan, hamtong, taga Barangay San Antonio, Ormoc City ug may kasong murder ug illegal possession of firearms.

Ang kapulisan pinangulohan ni Police Colonel Ramil Ramirez, nakadawat og impormasyon bahin sa nahimutangan sa suspek hinungdan nga giplano dayun ang pagdakop niini.

Nitabang usab sa operasyon ang kapulisan gikan sa City Intelligence Unit pinangulohan ni Police Lieutenant Jefferson Barrios; Police Lieutenant Ramil Caldona, hepe sa Police Station 2 ug Regional Intelligence Division.

Dala sa kapulisan ang warrant of arrest sa kasong murder ug kalapasan sa Republic Act 10591 o comprehensive firearms and ammunition law.

Ang mga warrant of arrest giisyu ni presiding Judge Girlie Borrel - Yu sa RTC Branch 35 sa Ormoc.

Wala na makapalag ang suspek sa dihang gipalibutan na siya sa mga pulis.

Si Daclitan ang gitudlo nga nipusil-patay sa negusyante nga si Engr. Wilson Sia niadtong Nobiyembre 8, 2016 sud sa usa ka carwash sa Barangay San Pablo, Ormoc. (JKDP)