PAGBALIK sa tradisyunal nga public utility jeepney (TPUJ) hayan mopasaka usab sa mga kaso sa coronavirus disease (Covid-19), pahimangno sa Department of Health (DOH) 7.

Samtang magkadaghan ang pampublikong sakyanan, mas sayon na usab ang paglihok sa katawhan hinungdan sa pagdako sa kahigayunan sa pagtakod sa Sars-CoV-2, kagaw nga nagdala sa Covid-19.

Niadtong Biyernes, nagsugod pagbiyahe ang mga TPUJ sa pipila ka mga karsada sa dakbayan sa Sugbo human makapasar sa motor vehicle inspection ang mga unit ug swab test ang mga driver.

Si Dr. Mary Jean Loreche, tigpamaba sa DOH 7, niingon nga “for the simple reason that because of the ease of transport, people’s movement becomes less hampered which in turn increases activities.”

Matod ni Loreche nga ang mas maayong pagtan-aw ning mao nga kalamboan mao ang paghimog duha ka mga lakang.

Una, ipailawom ang mga drayber sa regular random testing ug ikaduha, estriktong ipatuman ang mga health protocol.

Kini sama sa pagbutang kanunay og barrier sa tunga-tunga sa matag pasahero ug ang polisiya nga way face mask, way face shield di pasakyon.

Kinahanglan moobserbar usab sa hustong pagpanghunaw.

Si Director Eduardo Montealto, Jr. sa Land Transportation Franchising and Regulatory Board (LTFRB) 7, sa iyang bahin, niingon nga kinahanglan naa ang joint enforcement tali sa local government units (LGUs) alang sa epektibong pagpatuman sa health measures. (WBS)