BUN-OG ang naangkon sa usa ka traffic enforcer human gitabangan og kulata sa duha ka mga lalakeng hubog sa lungsod sa Dumanjug alas 2 hapon sa Sabado, Nobiyembre 16, 2019.

Tungod niini, gipasakaan og kaso ang duha.

Giila ni Police Major Ardioleto Cabagnot, hepe sa kapulisan sa lungsod, ang biktima nga si Rolito Cardiño, 41.

Samtang ang mga suspek nailhan nga sila si Archie Vergara, 29, ug Monico Mikael Nemenio, 33, pulos mga lumolupyo sa Barangay Candugay lungsod sa Barili.

Si Vergara ug Nemenio nadakpan ra usab sa mga pulis sa Dumanjug ug naaktohan pa samtang mikulata sa enforcer.

Matod ni Cabagnot nga ang sila si Vergara ug Nemenio gibadlong ni Cardiño nga niadtong tungora nagsusapinday nga naglakaw sa karsada tungod sa kahubog.

Sila giduol ni Cardiño ug gibadlong sa pagpadaplin sa luwas nga lugar. Apan giingong nasuko hinuon ang mga suspek ug gikulata si Cardiño. (BBT)