HUMAN maluwas ang usa ka dalaga nga moambak unta sa Marcelo Fernan bridge niadtong Dominggo sa gabii, ang director sa Mandaue City Police Office Police, Colonel Jonathan Abella, nitataw nga nagkinahanglan pa og pagbansay-bansay ang kapulisan nga mobantay sa taytayan, ilabi na sa counseling.

Kini tungod kay emosyonal ug mental nga bahin ang kombatihunon sa kapulisan ug sa biktima. Alang niya nga mas maayo kon duna sila’y insakto nga training mahitungod niini.

“Mag coordinate mi ana regarding sa mga steps or procedure unsaon pag-handle anang ingun ana nga problema ba. But for now, amo lang sa gi- comply ang instruction ni RD (Brig. General Debold Sinas) nga butangan og tawo didto (bridge)”, saysay ni Abella.

Makig-alayon si Abella sa mga kawani sa Department of Social Welfare and Development (DSWD) sa pagsugod sa training.

Giangkon usab ni Abella nga dunay lain-lain nga attitude ang mga biktima hinungdan nga mas maayo nga andam sila.

“Willing jud kayo mi kay mao gyud nay kulang sa mga first responders namo, unsaon pag-handle namo sa mga unang panghitabo kay dili tanan naay training. Mas maayo nga amo lang gyud i-coordinate sa DSWD (Dept. of Social Welfare and Development)”, matod ni Abella. (ANV)