GOBERNADOR Hilario Davide III gihilasan ug na-insulto sa suwat nga gipadala ni Governor-elect Gwendolyn Garcia nga nagpahinumdom ug nipasidaan kaniya sa di pag-issue og midnight appointments ug pagsulod sa mga midnight deal o anomaloso nga mga kontrata ug transaksiyon.

Sa laing bahin, pareho nang nangandam ang kampo nilang Garcia ug Davide alang sa transition gikan sa kasamtangang administrasyon ngadto na sa bag-o.

Tulo sa mga sakop sa transition team ni Garcia nga silang Atty. Manolette Dinsay, Atty. Lito Astillero ug Atty. Frank Dinsay V nidala sa suwat sa Kapitolyo nga iyang gipadala alang kang Davide.

Unod sa maong suwat ang komposisyon sa iyang transition team ug pagpahinumdom sa umaabot nga gobernador ngadto kang Davide labot sa di pag-issue og midnight appointments ug pagsulod sa mga midnight deal o anomaloso nga mga kontrata ug transaksiyon.

Giabi-abi ni Davide ang mga representante ni Garcia apan gipadayag sa gobernador nga na-insulto ug gihilasan siya sa “tenor” sa nadawat niya nga suwat.

Wa kinahanglana

Matod ni Davide, wa na kini gikinahanglan kay sa miaging buwan pa lang, na-umol na niya ang iyang transition team.

Dugang niya, di usab niya kinaiya ug di binuhatan sa iyang administrasyon ang paghimo og kwestiyonable nga mga appointment ug transaksiyon.

“Por bida pud oy! You know this is something nga dili kaayo ko mouyon sa iyang pulong diri (sa suwat) ba. This is not really necessary kay as a public official, as a governor, kahibalo man ta sa unsay tarong ug sakto nga buhaton,” namahayag si Davide.

Taliwala niini, gipaniguro ni Davide nga di siya mamahimong babag sa mga plano ni Garcia alang sa probinsiya sa higayon nga molingkod na isip gobernador ug siya isip bise gobernador.

Si Davide nagsugod nag pamutos sa iyang personal nga mga gamit sa iyang opisina sa Capitol Executive building.

Sa laing bahin, sa wala pa niabot ang mga representante ni Garcia, una nang nakigtigom si Davide sa mga sakop sa iyang transition team.

Turnover

Gawas sa pag-andam sa gikinahanglan nga mga report ug dokumento, nauyonan nila nga sa Hunyo 28 himuon ang turnover gikan sa administrasyon ni Davide nga udto sa Hunyo 30, nga natumong sa Dominggo.

Ang transition team ni Davide gilangkuban sa kasamtangang mga department head sa Kapitolyo.

Ang kampo ni Garcia, pinaagi ni Atty. Dinsay, namahayag nga wa pa mahisguti ang kapalaran sa maong mga department head sa higayon nga mo-asumir na siya sa katungdanan o kon kinahanglan na ba silang moduso na daan sa ilang courtesy resignation.

“Ilaha (dept. heads) nang ku-an (prerogative to file courtesy resignation) pero wala na gihisgutan ni Gov. Gwen,” niingon si Dinsay. (AZLG)