SI Senador Antonio Trillanes IV nipiyansa og P200,000 human ang Makati Regional Trial Court (RTC) Branch 150 niisyu og warrant sa pagdakop kaniya kagahapon.

Si Trillanes, sa usa ka interview sa Senado, niingon nga ang pagluwat og arrest warrant batok kaniya nagkahulogan nga namatay na ang demokrasya sa nasod.

“Natalo po ang demokrasya ngayong araw na ito... Officially ay wala na po tayong demokrasya,” siya nagkanayon.

Ang Makati RTC Branch 150 niluwat sa arrest warrant human ang mga kasong rebellion batok sa senador gibanhaw base Proclamation 572 ni Presidente Rodrigo Duterte.

Ang senador gikiha tungod sa iyang kalambigitan sa pag-atake sa Manila Peninsula sa 2007.

Laing Makati court, RTC Branch 148 nga naghupot sa kasong coup d’etat batok kang Trillanes sa Oakwood Mutiny sa 2003, moluwat pa og warrant of arrest.

Ang duha ka mga rebelyon gilusad batok sa administrasyon ni kanhi presidente Gloria Macapagal-Arroyo sa Magdalo, grupo sa mga sundawo nga usa na karon ka party-list organization nga dunay representasyon sa Kongreso.

“Gaya ng sinasabi ko last week, itong mga petisyon namin sa korte ay pagsubok sa ating demokrasya. Kahit pinakita na namin lahat ng ebidensya ay gayun pa rin, inilabas pa rin itong warrant of arrest na ito... This case goes beyond me,” nagkanayon si Trillanes.

“Nanaig ang kadiliman at kasamaan ito sa ating bayan. Kung ano man ang mangyayari sa hinaharap ay nasa kamay na ng buong Pilipino,” siya nagkanayon. SUNNEX