GIPANLANTAWAN na sa City of Talisay Traffic Operations Development Authority (CT-Toda) ang mas paghuot sa trapiko sa pipila ka mga dan sa siyudad, ilabi na sa pagsugod na sa Disyembre sa sunod semana.

Ilabi na nga tuo’g wala na unya ang mga himuon nga mga sale o pa-discount sa mga dagkong tindahan tungod sa holiday season.

Hinungdan nga gitug-an ni Jonathan Tumulak ang pangulo sa CT-Toda nga pakigtagbuan ang mga representante sa mga dagkong’ tindahan sa Talisay City, sa unang semana sa Disyembre.

Sa katuyuan nga masayran sa CT-Toda ang ilang mga kalihukan, sama sa sale nga sagad dagsaan sa mga tawo, alang sa himuon nga mga traffic scheme sa CT-Toda.

Hangyuon usab nila ang mga dagkong tindahan nga modugang og daghang security guard ning panahuna, diin ang uban ang ma-train sa CT-Toda sa basic nga pag-man sa trapiko.

Kini aron sila ang modugang sa pwersa sa mga traffic enforcer nga gipahimutang duol sa mga tindahan aron sa pag-manage sa trapiko.

Lakip sa anaa sa tigum, ang Talisay City Police, alang usab sa pagpahinumdom sa mga tindahan sa ilang responsibilidad nga matabangan nga malikay sa mga kriminalidad ang ilang mga kustomer, sama nalang gikan sa mga salisi, budol-budol, manyempuhay ug uban pa nga pagpangilad ug kawat nga sagad mahitabo diha sa mall.

Ang gitutokan karon sa CT-Toda nga tagbuon ang mga anaa sa Barangay Tabunok, Bulacao, San Roque, Lawaan 1, Lawaan 2, Lawaan 3 ug sa Barangay Linao. (FMD)