NANGAWAT og cellular phone nasikop sa entrapment operation sa kapulisan sa Barangay Pooc, Lungsod sa Santa Fe, Isla sa Bantayan niadtong Martes, Septiyembre 21, alas 6:00 sa gabii.

Si Richard Carallas Villacarlos, 27, tindero og itlog, dunay kapuyo ug taga Barangay Kabangbang, Lungsod sa Bantayan, gipasakaan og kasong robbery.

Ang biktima giila sa kapulisan nga si Janice Chavez Pacifico, 32, minyo ug taga Barangay Guiwanon, Bantayan, ug dunay sarisari Store sa naasoy na dapit.

Si Police Corporal Anecito Salonoy, imbestigador sa Santa Fe Police Station nga nahinabi sa Superbalita Cebu, si Villacarlos unang nangayo og P20,000 apan nahangyo og P5,000.

Gumikan niini, gipahigayon ang usa ka entrapment operation batok ni Villacarlos.

Sa binayloay sila og mensahe, si Villacarlos nipadayag nga makigkita aron pag-uli sa selpon ug buot makig-sex.

Si Villacarlos niingon nga ipadala sa GCash ang bayad ug ni-text sa pangalan sa padalhan ug contact number.

Dinhi nahibaw-an nila ang address ni Villacarlos. Dali silang nakig-alayon sa kapulisan ug nasikop si Villacarlos. (GPL)